Exo 32 | PMA | STEP |

Exodus 32

Me-Isrel Keil Arali Koteh Hatkatien Takeih One Ral Min Ahi ka Uva Netan min Nana Tai

Eksodas 32:7-16,19-23,30-35

Navong Ahi mul selus veah min Mosis, meatin keil amundemi Mosis mat en vatihou nesa veni romaitei mun. Sakini, akeih kat Eron keke houmon nana tai keke avaha netan mini. Sakini kur gol one ka mumon nana tai ven keil koa kur niniven buluk. Navong alesi, asan sanien votut keil mini ka uvol veni asi keil. Avisohiso avit, “!Koanik ahi koa kur ir ran out Isip!”

7 Navong meatin keil amumoni mukonek, Iahova viteni min Mosis vit, “Kikalah kihita netan veni meatin onom keil koa kolah lat keil ran out Isip asak kalkali ka umai atisaso. 8 Keil akalah amemea tuai ran sise koa navit kati keke avousili. Amumon buluk tai en gol ka amul uva netan mini ka amul amuas tirendan keil ka amuniti vi sanien va mini. Keil amul aviteni keke nana enek vi ahi one koa mulamun keil amea ran out Isip. 9 Nakilea keke keil avi vatkeih. 10 Navuroh kat keil ka, kosa, nu rasil lin keil varei. Konoumontei konahit kovahiles rendemien onak, numon asa koa ekvati. Hevus, numon keik ka vatiamal onom imai ihi mari vangi meatin tai.”

11 Ka Mosis peah Iahova, Ahi onen, keih imok vit, “Iahova, komulamun keil en tounah houlu tuai. ?Vensa kovuroh kat meatin onom keil koa kolah lat keil ran out Isip en mari keihoen onom? 12 ?Vensa me-Isip keil ihiteni ihit keik kolah lat meatin onom keil ran out Isip keke kokilea kovalamun keil avahina en vatihou keil ka kovou lin keil? Konavuroh kattei li keil, kihiles rendemien onom elis. Iahova, konasantei li mahien koanek min meatin onom keil. 13 Kindem kat meatin toumien onom keil: Ebraham, Aesak ka Siekob. Kindem kat hatkatien takeih koa komumoni ral min keitel. Kovit titaeatel hehi houlu vis hehi houlu mok hesuval hitu keil ten teilang. Kovat kati min keitel keke kisan atan hehi onen koakeil ikistal en vatiamal oneatel lises ka lisenges.” 14 Sakini, Iahova viles ris rendemien onen, ka rosantei mahien vaha min meatin keil onen suval koa kei viteni.

15 Evus, Mosis suvul eris vita netan en vatihou. Mul vous ahat elu koa Ahi keinges ra lati ran mari ahat tai ka mahinhin. En ahat elu enek, Ahi mutis mengkatien onen mul vasi usite keilu.

19 Navong Mosis mul mai vesesal ven keil, les buluk keke keil amul uvol rahiti. Navong lesi, tin katiat vis katiat. Ka en out enek, en tave vatihou, kei kopahas ahat keilu koa vousi mita. 20 Kei mita kulat buluk koa keil amumoni ka soni va en ahang mukurle. Evus, muti lini mai vi vulimeas, ka so rasil lini va en oai. Mumoni evus, sakin me-Isrel keil vasi umai amuni.

21 Kei viles, les Eron ka viteni mini vit, “?Meatin keilek amumon sa enuk keke sakin keik komumon keil umot en mari tisaen ekek?”

22 Eron vit risi mini vit, “Mosis eli, konavuroh kattei nau li. Keik kokilea keke meatin keil ekek, lises envatien one mul en sakien tisa keil. 23 Keil aviteni minau avit, 'Komai mereingeingen asa koa kula Mosis koa lah lat komai ran out Isip. Sakini, kumon ahi tai koa kilea valamun komai.'”

30 Out mulan, Mosis mulomal en meten meatin keil ka viteni min keil vit, “!Kami mimumon mari tisaen tai! Ka kosa, mahina ris en vatihou nesa mahisu min Iahova. Vahera nakilea mapeah enmahisien onen keke naleletei natisa en kami ven tisaen onami.” 31 Sakini, Mosis vina ris ven Iahova ka viteni mini vit, “!Aue li! Meatin keil ekek amumon mari tisaen tai li. Amumon ahi tai en gol ka uva netan mini. 32 Napeahik, kumon methos onom eli min keil. Ka munak emrovattei, kisulin varei isok emun ran Tus ten Moulien onom koa komutis kat isen meatin onom keil amul ien.”

33 Iahova vit risi mini vit, “Koakeil koa amumon tisaen va kat inau, keil enges nisulin ise ran Tus ten Moulien onak. 34 Kiha kilamun meatin keil miheha en out koa naviteni tuai minuk. Kindem kati keke angelo onak helamun kami miheha. Ka kilea emun keke avong mul mai keke nisan mahien min meatin keil ekek ven tisaen one.” 35 Sakini Iahova san mari mesaien tai va kat meatin keil ven buluk koa asakin Eron mumoni.